"Fröhlich soll mein Herze springen" (1) woar mir alt emmer det schörnste Chresdachsleed.
Nu begob et sech zo dr Zitt, wie ech em Kittche am Onnern Schloss e dr Stadt arbte.
Doa woar en Mäckes, dä hadde ahl Lü bet dm "Oma-Trick" a de Husdürn börs bedubbelt on beklaut.
Dat fon ech zom Speje on kon en derweje erscht net got e dr Nöjte verknuse.
Nur woar hä sost en ömgänglecher Karle.
Hä koam us Polen on schwatte bet nem wahne Akzent.
On hä kon wahne senge.
Dat hadde hä doaheim studiert, on och alt e dr Oper gesonge, bevor hä ob en schleechte Wech geroare woar.
Ech doachte, so en Talent derf mr net usser Acht loase.Chresdach ston vor dr Dür.
Va dusse vam Mart kon mr dr Glöhwing, det Bier, det Zitzelitz (2), de Würschtcher on dr Broatfösch rüche.
Och det Geplarr va de Karusselle on det Gebölk va de Besoffene loag e dr Loft.
Mr ha da zesame e em sinner Zell geöbt; hä het gesonge, on ech ha ob dr Gidar gespeelt.On dat woar oos Leed for de Chresdach em Knast e dr schmuddeleje Turnhalle em Schloss, die fröher gewess moa en fürschtlech Saal gewäse woar.
Ech schriewe sin Gesang so aggurat ob, wi ech et ka.
On wä meint, ech wöll dä Ma derweje usslache, dä sall dat röhich denke.
Hä song so, dat ech dat gewess min Läwe lang net vergesse ka.
Ech hädde hart ob min ahl Gidar plärrn kon."Froollick soohl mein Härrtzä s-prrin-g-än
Diesärr Zeit, da voohrr Frroid allä Än-g-äll sin-g-än
Hohrrt, hohrrt, wie mit voollän Chorän
Allä Luuhft, lautä rruuhft
Chrristuuhs ist geborrän"Wie hä ferdich gesonge hadde, woar Chresdach worn.
Döscher all dä Karle, die en Masse bexiert ha.
On die et va em gesonge besser gehoart ha wie et dr Pasdor hädde sä kon:
"For au es ho dr Heiland geborn" (3)
(1)
"Fröhlich soll mein Herze springen
Dieser Zeit, da vor Freud' alle Engel singen
Hört, hört, wie mit vollen Chören
Alle Luft, laute ruft
Christus ist geboren"(Text: Paul Gerhardt)
Evangelisches Gesangbuch (EG), Nr. 36(2)
Lakritz(3)
Lukas 2,10