geschwatt.de

Für Shaked

🌐

Bet Besooch us Israel fuhrn mr noa Dortmund geje Freiburch et Stadion
Doa sin mr gern, so veel wie mr kon
De Kaarde hadde mr us Eiche va nem anern BVB-gecke Pastor
Oos Gast koam us siner Storw, ech doachte, dat es itz net woahr

Hä hadde en roare Bayernfrack on Schal öm dr Hals röm a
Wie mr dat e Dortmund net goot verknuse ka
"Lewer Freund, dat gehrt net bet däm Trikot on däm Schal" 
"Weröm, ech sin och fußballgeck on schake gern geje dr Ball" 

"Dat es och schör, nur e däm Bayernfrack passierd et e moa schwin
Dat mr einer geflatscht kriejt, weil em Stadion och Hornoarse sin
Derweje do dr for Dortmund lewer en aner Trikot a
Awer nur wenn net Schalke 04 stert dra"

Da si mr gefahrn, et woar wie emmer
Dr Stau wur va einer ob de aner Minudde schlemmer
"Wie säste de da ob Hebräisch geje en Stau?"
Hä meinte drüj: "Pekak"
Wie woahr, Stau es Schess, dä Schwatt es kloar on strack

Hä säd:
En Pekak het och sin Goores, weil min Bloas wahne pressiert
Ech könne moa hener de Leitplanke höbbe, doabet ken Malör passiert"
"Wenn et sin moss, nur höbb da och hällob weher herbij
Weil wenn dr Pekak rollt, moss ech fahrn, soost broddeln de Lü

Och es det Rushöbbe ob dr Autoba va der Polezei net gern geseh"
"Bi mir doaheim och net; velichts dröckt dr Sheriff en Au zoo
Dem sin Bloas döt em gewess och alt e moa weh"
Mr ha da so ewe noch en Klohüsje geseh 
Net wahne reilech, awer en Wohltat for all on och besser so

Mr ha noch meh domm Züch geschwatt, gelacht on de Zitt röm gebroacht
On worne schwinner e Dortmund wie em Pekak gedoacht

En Stadionbroatwurscht hedde mr gern noch spendiert
Awer frösch Pannekooche bet Nutella ha och pläsiert

Wie mr am En e dr Nordkurve soasse, het de Borussia fönne geje nix gewonn
Onner'm bloae Hemmel bi warmer Septembersonn
En herrlich Sonnoawend on Schabbes em Westfalenstadion

Nur om Wech noa heim woar da alt weher Pekak
E dem stonne mr da got gemötscht for me wie en Ston
Doabi en veel ze düer Sänwitsch-Dong bet Käs on Tomate gesse

Dat mr Jure on Chreste sin, doava woar oos det Schirwel voll
Nur speelt dat onner Freunde öwerhaubt ken Roll