geschwatt.de

🌐

               Für Dechant Karl-Hans Köhle, Siegen.
               In dankbarer Erinnerung an viele schöne Erlebnisse,
               die wir einst als Pfarrer unserer Gemeinden geteilt haben.
               Mit ihm war ökumenische Begegnung immer so:

E dr katholische Nochbergemeij woar dr Priester en ömgänglech Ma
Mr säde, dat mr bet dem Pärer klaue ka
Hä woar en Schalker on ech BVB
Nur derweje schloage mr oos net de Köppe e
Och sost net, mr ha emmer gemacht, dat et gert
Weil mr als Chrestelü am En sowieso ob einer Sidde stert

Mr ha Gottesdeenst zesame gehale, gesonge, gebät on gelacht
Veel Hochzitte gefiert, on Spaß dra gehat.

Verzärrln well ech va ner gemeinschafdlech Trauung bet Taufe
Em kirchliche Jargon schwätzt mr da va ner "Traufe"

De Brautlü wolle de Trauung gern e evangelischer Manier
Se meinte, et wör da doch extra schör 
Wenn de Taufe hernoa da ob katholisch wör

Ob katholisch wel mr dat Kend net nur bet Wasser besprenge
Mr wel em och noch "Christi Wohlgeruch" brenge
Et bet "Chrisam" eriewe, dat es en edel Salböl
On for dat Kend gewess en schörnes Geföhl

Säd hä, "gew du ho Gottes Säje ob dat Salböl drob"
Ech sä, "nä, doa goa mr als Evangele de Scho bi ob
Mach du dat bet dem Öl moa lewer allei
Ech sä hennerher en Schwatt for de Gemeij
Och for de Ellern on de Padde en Säje
Mr wern dat Kend schor zesame e dr Gnarestand kreje"

Wat hädde se gebroddelt bim Erzbischof Paderborn on em Kircheamt Bielefeld
Nur dat woar egal, Amtslü on Bischöfe verstoah net emmer veel va dr Welt

Dat es en Geschechtche va veele, on ech wör wahne froh
Kön et bi dr Ökumene emmer so herzlich zogoa

Et göt och anner Geschechte, nur ei wel ech verzärln
Weje dr goore Nochberschaft do ech dat net arich gern
He dat moa koam dr Priester us dem Ölper Palotti-Hus
Mr weiss, em Kölsche sin de Katholike bal allei onner sech
On wenn mr a dr Falsche geröat, wür et alt e moa rabbelech

Et woar weher en Hochzitt
Ech koam goot gemötscht e de Sakristei
Nur dat Leedbläddche, dat woar mr net einerlei
"Segne, du Maria, segne mich dein Kind"
Dat woll hä bet oos senge
Doageje mosst ech protestiern
"Wommer net bet enanner e Freundschaft fiern

Nom Maria wird bi oos net gebät
Werweje dat Leed he ho nix ze sooche het
Mr kon veel zesame senge vam hemmlesche Vater"
Nur doava woll hä nix hörn, dr Palotti-Pater
"Se sin he em Dom nur en Gast ob Besooch
He senge mr wie et stert em katholische Booch"

Ech doachte:
"Du kast röhich glauwe, dat en Rechteck es rond
Awer he dat Gedäh, dat wird mr ze bond
Ech sin he och net en Dost ob Besooch
On itz wommer arwe, de Brautlü warde lang genooch

Wenn de obedengt wet, wirschte seh, wie en Evangele funktieniert
On geje din Olitlechkeit protestantiert"

Wenn de Pastörn da zesame e de Kiche goa, es et goorer Bruch
Dat dr Katholik dräht sech nom Tabernakel on macht doabi en Knicks
Dr Evangele dräht sech bet röm, awer dä säd on macht nix

He dat moa, hat ech mr hällob öwerlät
Wird sech net nom Tabernakel römgedräht
Ech drähte mech annerscht röm on machte en Knicks e Rechtung Gemeij
On dr Pater Palotti ston vorm Tabernakel allei

Henerher säd hä, "Doa es awer en börs Fähler passiert"
Ech sä, "weil ech de Broardstöckcher em Tabernakel net ha applaudiert
Min 'Fähler' es, wie et sech evangelisch gebührt
Dat mr bet nem Knicks de Gemeij us lebenich Lü ästemiert"

Ökumene ka sin so or so
Em Sejerland, em Kölsche on anerschtwo