En ahl Bekannter stehrt a dr Dür vam Pastornshus.
"Ech on min Schwester ha wahne Honger.
Kon se oos helfe?""Njoa", sä ech, "ech mach gern en Dudde ferdich:
En paar Brördcher on Schwarzbroardsdonge, doabi en half Pond Bodder,
e Gläsje bet Krut on en paar Spallern Wurscht on Käs.
For det Meddachesse egemachte Arwesersobbe
on for dr Noadösch Banane.
Geje dr Durscht en Fläsche Soaft. Goot so?""Ach nä, ech well so gern moa bim Bäcker Lache ekaufe".
"Va mir us kon se gern bi Lache ekaufe. Da roofe ech grad moa Lache Hans a on sä em,
hä söll en schör Paket bet Broard, Brördcher on Kooche ferdich mache on mir da de Rechnung schecke.
Es dat itz besser?""Nä, lewer hädde ech Bares zom Ekaufe e dr Däsche.
Awer wenn Se mr net helfe won, da moss ech bet minem Honger weher goa.
Nur hädde ech net gedoacht, dat en Pastor so obarmherzich sin kön."