geschwatt.de

🌐

Gestern woar min erschter Dach e dr Universität
"Wat wedde da doa?", ha mänch Lü gesät
 Ech studiern Theologie on Philosophie
"Loaset bliewe, Jong, dat brengt nix, spar dr de Möh"

Min erschte Vorläsung wor över Kants Immanuel
"Kritik va dr reine Vernonft", dat säde mr net veel
Doa gonget öm Urteile, on wesst er wat
Die sin synthetisch or analytisch zesame gesat

Mr ka jo sä: "Fraue sin blond"
Dat es en synthetisch Urteil a priori, nur es et net woahr
Weil analytisch us Erfahrung wird det Gejeteil kloar
Derwäje farwe Fraue de Hoarn bim Frisör
Sä mr nemes, dat dat bi em doaheim net so wör

Herberjersch Sepp meinte "Dr Ball es rond"
Bim Schake (1) ka mr seh, dat dat och stemmt
En synthetisch Urteil, dat och a posteriori net klemmt
"En Speel duurt neunzich Minudde, Bäll higgeln on sin rond"
Dat es all woahr, nur net all Fraue sin blond
Herr Professor, dat ha se erklärt, dat mr dat och begrifft
Nur es en Speel erscht vorbi, wenn dr Schiri pifft

Dat wen ech moa ob de Metaphysik on ob dr Hemmel a
Doachte e Könichsberch dä klooge Ma
Va nem Gott wird e dr Kirche veel gesät
Nur ob dä wirklich existiert, es net rei vernönftig beläht

Mr ka em Herze glauwe a en Gott on dat dä hät
E dr Bevel geschwatt, nur dat weis de Vernonft e Raum on Zitt net
Dat is wie bet de blonde Hoarn on dä ronne Bälle
Net allet, wat mr gern ha wel, görret ob alle Fälle

Et existiert net alles, wat mr e oosem Schirwel denke
Derweje sall mr sech rationale Bewiese for en Gottheit schenke
Mr ka en Gott moralisch posteliern or sech em Herze wönsche
Nur blibt doabi bet de Föös ob dr Er, ihr fromme Mensche

"Ech hal lewer min Mull on proahln net doava
Wozoa ech bet minnem Geläll ken Zogang ha"

So ogefähr säde et dr Ludwig Wittgenstein
Bet Verwandtschaft e Laasphe, on e Wien on e England doaheim

Dat scheckt for ho, mänches sä ech veelichts verkoahrt
Awer am erschte Dach bi Kants Immanuel ha ech veel geloahrt

(1) schake = Fußball spielen, kicken